Umskipting Wikus

District 9 er ein besta geimverumynd sem gerð hefur verið að mínu mati. Það er svo margt í gangi í þessari mynd að það er hrein unun á að horfa burt séð frá vel gerðum tæknibrellum og spennandi hasar. Það er umskipting sem minnir á fræga sögu eftir Franz Kafka, og þannig séð er þetta áhrifamikil tragedía. Það er félagsleg gagnrýni á aðskilnaðarstefnu og xenófóbíu sem og volduga vopnaframleiðendur. Það er húmor í myndinni og hún er hröð og vel skrifuð. Einnig má líta á   myndina sem skoðun á mannlegu eðli og þá sérstaklega hve ástin er lífseig samanber lokaatriðið í myndinni. Það er ekki á hverjum degi sem svona gæða vísindaskáldsögur detta fyrir augun og það er um að gera að njóta þessarar myndar oftar en einu sinni.

Þessi og Alien eru að mínu mati bestu kvikmyndirnar sem gerðar hafa verið um geimverur.

Sexí sviti, yfirvaraskegg og hættuleg leggjalöng dama .

Þó að þessi mynd sé nú orðin jafngömul og undirritaður þá er hún ennþá rennsveitt, heit og sexí. Alveg hægt að slengja rauðvíni í glas og tína nokkur jarðarber og koma sér í hættulega sveitta og sexí stemningu með Kathleen Turner ("you shouldn't wear that body") og William Hurt (flottur með töff mottu). Þessi klikkar ekki.

Myndin heitir Body Heat og er leikstýrð af Lawrence Kasdan.

Amour

Þá er ég búinn að horfa á þessa. Það er ekkert verið að skafa utan af því hérna eða fegra eitt né neitt um það að verða gamall og veikburða. Það eru engir strengir eða dramatískir hápunktar þar sem einhver segir eitthvað fallegt og áhorfendur fara að væla. Þetta er anti-Hollywood. Myndavélin er bara sett á þrífót og látin standa þar á meðan við fylgjumst með gömlu hjónunum takast á við hríðversnandi ástand konunnar og þá aðallega hvernig maðurinn höndlar það að konan hans missir tengslin við raunveruleikann og þarf sífellt meiri umönnun. Þetta er bara mynd um það að verða gamall og veikur. Já og það er líka dúfa í myndinni. Gott, áhrifaríkt og vel leikið bíó.

System of a Down - Prison Song

Það eru ekki mörg bönd sem vitna í rannsóknir í lögum sínum og hvað þá að gera það á sama tíma og þeyta flösu í allar áttir. Frábært lag af Toxicity sem er orðin 12 ára gömul!

James Blake - Retrograde

Þetta er eargasm dagsins. James Blake af Overgrown sem er töff plata og þess virði að hlusta á. Hann er með ótrúlega rödd og gerir súper slaka og sexí tónlist.

Klassík

karlmaður með ofskynjanir og krónískan vindgang, lögreglumaður með mikilmennskubrjálæði, og túristar með vafasöm fetish koma öll við sögu í þessu klassíska lagi. 

Bumbukóngar Evrópu og Kínverjar

Í ljósi þess að við Íslendingar erum nú bumbukóngar Evrópu langar mig til gamans að bera okkur saman við öllu fitusnauðari Kínverja. Gen hafa auðvitað eitthvað að segja um mismunandi líkamsstærðir en venjur er líklega stærsti orsakaþátturinn.

Fyrst eitt orð: Síðdegiskaffi.

Kínverjar fá sér ekki síðdegiskaffi en við Íslendingar úðum í okkur sætar kökur og brauð um miðjan dag. Ég er svo sannarlega engin undantekning á því þó það hafi minnkað eftir að ég flutti til Kína.

Málið er nefninlega að í Kína er  hádegismaturinn  mun mikilvægari máltíð heldur en kvöldmatur. Þeir fá sér heita máltíð í hádeginu og borða vel þannig að þeir verði ekki svangir um daginn. Ef þeir borða á milli mála er algengt að fá sér ávexti þó að lítil kex (ekki súkkulaðikex) séu líka vinsæl sem viðbiti.

Orð númer tvö: Hreyfing.

Það hafa ekki allir efni á að kaupa sér bíl í Kína og almenningssamgöngur eru nokkuð góðar. Það þýðir að fólk labbar meira. Sjálfur nota ég alltaf strætó í Kína og þarf stundum að ganga ágætis vegalengdir til að ná áfangastað eða til að ganga heim.

Og svo annað: Matur

Kjöt er frekar meðlæti heldur en aðalrétturinn í máltíð og fólk borðar yfirleitt meira grænmeti en kjöt. Hrísgrjón eða núðlur eru yfirleitt undirstaða máltíðarinnar og grænmeti og kjöt er borðað með því. Matur er líka borðaður í mun minni skömmtum og fólk deilir matnum saman sem kemur pottþétt í veg fyrir að fólk borði of mikið.

Að lokum: Eftirréttur

Í Kína tíðkast ekki að borða sæta og fitumikla eftirrétti. Þeir borða yfirleitt ekkert eftir matinn.

Ofþyngd á samt eftir að verða vandamál í framtíðinni í Kína með meiri þróun   og  stærri millistétt. Ég held samt að þessar venjur sem þeir hafa muni leiða til að vandamálið verður ekki eins stórt og á vesturlöndum.