Duglega girtur

Nú er mál að girða sig í brók enda búinn að vera með allt niður um mig síðan fyrir jól. Lífið er áskorun sagði einhver og það er um að gera að gefa sjálfum sér krefjandi áskoranir. 10 plötur sem hafa haft áhrif á mig er of létt og því kynni ég hér:

10 LÖG FRÁ 2014 SEM ÉG MUNDI TAKA MEÐ Í LEIKFIMI.

og ballið byrjar..

Sia - Fire meet Gasoline

Manic Street Preachers - Walk me to the bridge

Talib Kweli - Violations

Royksopp & Robyn - Do it again

Royal Blood - Figure it out

My Brightest Diamond - Pressure

Spoon - Do you

Architecture in Helsinki - I might survive

Broken Bells - Perfect world

Michael Jackson - Slave to the rhythm

Söngdívur

Hér eru tvær söngdívur sem hafa heillað mig upp úr skónum með ljúfum tónum. Fyrst er það hin ameríska Annie Erin Clark, betur þekkt sem St. Vincent með lag sem heitir I Prefer your Love.

Svo er það Lana Del Rey hér í fyrsta laginu af nýju plötu hennar sem heitir Ultraviolence. Þetta vinnur á.

Veep

Ég hef örlítið verið að kynna mér þessa sjónvarpsþætti og horft á nokkra þætti í fyrstu seríu. Mér finnst þeir fyndnir og aldrei að vita nema maður haldi áfram að horfa á ævintýri varaforsetans.

The Fisher King

Ég hafði aldrei gerst svo frægur að stúdera þessa kvikmynd að alvöru. En eftir að hafa horft á hana þá verð ég að koma fram í dagsljósið og mæla með ræmunni. Jeff Bridges og Robin Williams báðir flottir og mynda eitthvert eftirminnilegasta tvíeyki í kvikmyndasögunni. Myndin blandar skemmtilega bráðfyndnum samtölum, karakterstúdíu og hádramatík og útkoman eftirminnileg og áhrifarík.

The Iceman

The Iceman er kvikmynd sem er skyldu áhorf fyrir fólk sem er áhugasamt um dimmari hliðar mannskepnunnar. Myndin byggir á ævi Richard Kuklinski (líklega skólarbókardæmi um mann með andfélagslega persónleikaröskun) sem er sagður hafa myrt yfir 100 manns en hann starfaði sem leigumorðingi. Það sem er þó magnaðast við söguna er að Kuklinski var giftur og átti tvær dætur sem allar höfðu enga hugmynd hvað fjölskyldufaðirinn bardúsaði utan heimilisins. Ég get skilið gagnrýnina sem myndin hefur verið að fá en margir hafa bent á að kvikmyndin sé ekki alltaf sannsögul, það sé hoppað yfir mikilvæg atvik og mikilvægir hlutir teknir úr til að gera Kuklinski samúðarhæfan. Til dæmis kom það aldrei fram í myndinni að Kuklinski beitti fjölskyldu sína líkamlegu og tilfinningalegu ofbeldi. En þrátt fyrir þessa vankanta þá finnst mér kvikmyndin góð og sérstaklega er Michael Shannon magnaður í tiltilhlutverkinu.

Kon-tiki

Ég hysjaði loksins upp um mig brækurnar og setti á þessa norsku kvikmynd sem tilnefnd var sem besta erlenda kvikmyndin á óskarnum 2013. Og já ljómandi fín kvikmynd og allt byggt á sönnum atvikum þó eitthvað hafi þeir notað skáldaleyfi en það var nú eitthvað lítils háttar. Mjög vel gerð kvikmynd og kom mér á óvart hversu mikil gæði er að koma úr kvikmyndaframleiðslu í Skandinavíu. Mæli með þessari ef menn vilja hysja upp um sig skandinavísku kvikmyndabrækurnar.

Dawn of the Planet of the Apes

Mér fannst hún góð framan af en seinni hlutinn fannst mér klunnalegri og falla í eitthvað part 2 kökuform. Ég get ekki sagt að ég sé spenntur fyrir næstu mynd. Mæli frekar með að kíkja á fyrri myndina sem mér fannst betur heppnuð.